Af Viðreisn fæðist ReisVið, ,,varnarþingin verða haldin á Kiki”

 Kjartan Þór Ingason  og lógó ReisVið

Kjartan Þór Ingason og lógó ReisVið

Í mars þessa árs var hinsegin félag Viðreisnar stofnað, en það heitir að sjálfsögðu ReisVið! Kjartan Þór Ingason einn stofnandi félagsins segir að hugmyndin að félaginu hafi komið í skyndi.

,,Stófi (Kristófer Alex Guðmundsson) bar fram hugmyndina að stofnun félagsins á flokksþingi Viðreisnar sem var haldið í mars á þessu ári. Þá höfðum við á þinginu verið að ræða hvernig við ætluðum að móta hinsegin stefnu flokksins, hvaða markmið við ætluðum að setja í jafnréttisbaráttunni og þar fram eftir götum.”

Þó baráttan fyrir jafnrétti sé að sjálfsögðu fúlasta alvara þá má ekki gleyma gleðinni. ,,Þó ReisVið ætli að beina sjónum að stjórnmálalegum hliðum hinsegin málanna þá er líka gleði. Varnarþing félagsins er til dæmis staðsett á Kiki,” og stofnfundur félagsins var haldinn í karókí herbergi Rokksafnsins.

,,Mig hlakkar rosalega til að vinna í ReisVið og er mjög heppinn að vinna með yndislega fólkinu sem er þar,” en formaður félgagsins er Gulli Kristmundsson og opinber dramadrottning ReisVið er María Rut Kristinsdóttir. ,,Okkur hlakkar öllum til að leggja okkar á vogarskálarnar í baráttu hinsegin fólks.”

En hvað ætlar ReisVið að leggja til málanna?

,,Við ætlum til dæmis að berjast fyrir einu af stefnumálum Viðreisnar sem er að koma hinsegin fræðslu inn í skólakerfið.

Það þarf líka að bæta verulega úr löggjöf um hinsegin fólk” og nefnir Kjartan sem dæmi stöðu intersex fólks á Íslandi og umdeild heimild lækna og foreldra til að ákveða hvort kyn intersex börn eiga að vera þegar þau fæðast.

Samkvæmt mælingum ILGA (International Lesbian, Gay, Bisexual, Trans and Intersex Association) mælist Ísland aðeins með 13% af löggjöf sem tryggir réttindi hinsegin fólks. ,,Við erum komin ágætlega langt félagslega séð en við erum ekki að standa okkur á lagalegu hliðinni. Þessvegna er mikið sóknarfæri að hafa hinseginfélag innan stjórnmálaflokks sem getur verið í nánum samskiptum við löggjafa, ráðherra og fulltrúa á sveitastjórnarstigi.”

Annað dæmi um umdeilda löggjöf um réttindi hinsegin fólks er svo blóðgjöf homma sem hefur lengi vel verið bönnuð á Íslandi. Hinsvegar segir í Farsóttafréttum, tímariti sem Landlæknir gefur út, að Sóttvarnarlæknir hyggst leyfa hommum að gefa blóð gegn því að þeir stundi ekki kynlíf í sex mánuði en slík krafa myndi sumum þykja óraunhæf, allavega fyrir suma homma. Ástæðan fyrir kröfu um kynlífsbindindi væri sú að minnka áhættu á HIV og lifrabólgu B og C smiti með blóðgjöf.

Fyrir utan það eru málefni hinsegin eldri borgara áhersluatriði hjá ReisVið. ,,Við héldum umræðufund um þau málefni um daginn, en félagsmaður frá Samtökunum ‘78 sem er mjög fróður um málefni hinsegin eldri borgara kom og hélt fyrirlestur.” Kjartan segir að það sé mikilvægt að vinna náið með Samtökunum ‘78 enda mikið sameiginlegt með markmiðum og starfsemi.

,,Þessi samtök eru hornsteinn jafnréttisbaráttu hinsegin fólks. Þau hafa náð að sýna fram á að hugtakið hinsegin er risa stór regnhlíf og undir henni er mjög fjölbreyttur hópur.”

Samtökin ‘78 hafa líka barist fyrir sæti að borði ákvarðana löggjafans um hinsegin fólk, undir slagorðinu ,,ekkert um okkar án okkar”.

Kjartani finnst mikilvægt að til séu óháð samtök til að berjast fyrir réttindum hinsegin fólks. ,,Samtökin ‘78 eru opin öllum félagsmönnum og krefjast ekki ákveðinna stjórnmálaskoðana.”

En eins og áður sagði ætlar ReisVið að nota stöðu sína innan stjórnmálaflokks vel. Það verður eflaust áhugavert að mæta á næsta varnarþing félagsins á Kiki!

Sólrún Freyja Sen skrifaði




Vinsælast

Meira

Sólrún Sen