Tillaga um að minnka mismun á námsárangri barna innflytjenda samþykkt

,,Borgarfulltrúar Sjálfstæðisflokksins lögðu fram tillögu um að minnka mismun á námsárangri barna innflytjenda og annarra barna, og hefur sú tillaga verið samþykkt í borgarstjórn”, þetta segir í tilkynningu frá Janusi Arni Guðmundssyni, framkvæmdarstjóra borgarstjórnarflokks Sjálfstæðisflokksins.

Á Twitter síðu Katrínar Atladóttur, borgarfulltrúa Sjálfstæðisflokksins, kemur fram að tillögunni var fyrst frestað til næsta fundar þegar hún var kynnt. ,,Svo þegar við sjáum útsenda dagskrá þá er meirihlutinn kominn með alveg eins tillögu. Þýðir væntanlega þau geta ekki hugsað sér að kjósa með okkar góðu málum, heldur verð að að gera að sínum. Lýðræðislegt.”

Hinsvegar tísti Katrín í kvöld að meirihlutinn hafi dregið tillögu sína til baka og samþykkt tillögu Sjálfstæðisflokksins.

,,Það voru tvær nokkuð samhljóða tillögur sem lágu fyrir. Á endanum gerðu þau breytingatillögu á okkar tillögu, þannig orðalaginu var aðeins breytt. Þá í framhaldinu drógu þau sína tillögu til baka og samþykktu okkar tillögu,” segir Jórunn Pála Jónasdóttir borgarfulltrúi Sjálfstæðisflokks.

 Jórunn Pála Jónasdóttir, borgarfulltrúi Sjálfstæðisflokksins

Jórunn Pála Jónasdóttir, borgarfulltrúi Sjálfstæðisflokksins

,,Það var búið að gagnrýna þau fyrir að vilja ekki samþykkja tillöguna frá okkur en koma svo með nákvæmlega eins tillögu. Það kemur skringilega út. Á endanum varð þetta niðurstaðan.”

Í tilkynningunni segir að ,,lagt sé til að námsráðgjöf og heimanámsaðstoð til barna með annað móðurmál en íslensku verði efld og skimað sérstaklega eftir námsörðugleikum í þessum hópi barna með því að taka í notkun viðurkennt matstæki sem mælir almenna þekkingu og námsfærni á móðurmáli nemanda.

Þá segir jafnframt í tillögunni að „áætlanir um móttöku barna innflytjenda í leik-, grunnskólum og á frístundaheimilum verði endurskoðaðar. Ríkið og aðrir aðilar sem eiga aðkomu að mótun menntakerfisins beiti sér fyrir því að gefið verði út námsefni sem hentar nemendum undir 18 ára með annað móðurmál en íslensku og jafnframt að auknu fjármagni verði varið til rannsókna og kennslu á þessu sviði. Samstarf við önnur sveitarfélög um málefni barna með annað móðurmál en íslensku verði eflt.”

Hér má lesa tilkynninguna í heild sinni:

Stefnuyfirlýsing borgarstjórnar um að minnka aðstöðumun barna innflytjenda

Markmiðið er að tryggja að börn innflytjenda og börnum með annað móðurmál en íslensku eigi jöfn tækifæri til náms og þátttöku í íþrótta- og tómstundastarfi.

Tillaga borgarfulltrúa Sjálfstæðisflokksins um að minnka mismun á námsárangri barna innflytjenda og annarra barna var samþykkt í borgarstjórn samhljóða í kvöld í kjölfar breytingatillögu meirihlutans. Í tillögunni segir m.a. að Reykjavíkurborg beiti sér fyrir því að minnka eða útrýma þeim aðstöðumun sem birtist í námsárangri og þátttöku barna af erlendum uppruna í íþróttum og tómstundum.

„Það er 23% munur á meðaleinkunnum barna af innlendum og erlendum uppruna. Það er mesti munur sem fyrirfinnst í OECD ríkjunum,“ segir Jórunn Pála Jónasdóttir varaborgarfulltrúi og tillöguflytjandi.

Í tillögunni er lagt til að námsráðgjöf og heimanámsaðstoð til barna með annað móðurmál en íslensku verði efld og skimað sérstaklega eftir námsörðugleikum í þessum hópi barna með því að taka í notkun viðurkennt matstæki sem mælir almenna þekkingu og námsfærni á móðurmáli nemanda.

Jórunn segir að stefnuyfirlýsing af þessu tagi hafi aldrei verið rædd hvað þá samþykkt í borgarstjórn.

„Vonandi verður þessi tillaga til þess að staða þessara barna batni. Og að skjólastjórnendur og aðrir starfsmenn í skólakerfinu í Reykjavík finni áþreifanlegan mun,“ segir Jórunn Pála.  

Þá segir jafnframt í tillögunni að „áætlanir um móttöku barna innflytjenda í leik-, grunnskólum og á frístundaheimilum verði endurskoðaðar. Ríkið og aðrir aðilar sem eiga aðkomu að mótun menntakerfisins beiti sér fyrir því að gefið verði út námsefni sem hentar nemendum undir 18 ára með annað móðurmál en íslensku og jafnframt að auknu fjármagni verði varið til rannsókna og kennslu á þessu sviði. Samstarf við önnur sveitarfélög um málefni barna með annað móðurmál en íslensku verði eflt.“

Vinsælast

Sólrún Sen