Ásdís Halla og Hvalur hf hljóta frelsisverðlaun SUS

 Kristján Loftsson ávarpar samkomuna við afhendingu verðlaunanna

Kristján Loftsson ávarpar samkomuna við afhendingu verðlaunanna

Í gær voru frelsisverðlaun Sambands Ungra Sjálfstæðismanna (SUS) veitt við hátíðlega athöfn í Valhöll. Þetta er tólfta árið sem verðlaunin eru veitt, en Ásdís Halla Bragadóttir hlaut verðlaunin í ár fyrir áralanga baráttu fyrir auknu valfrelsi í heilbrigðis- og menntamálum.

,,Sem bæjarstjóri Garðabæjar studdi hún við sjálfstæðan rekstur skóla í sveitarfélaginu. Hefur það leitt til þess að skólakerfið í Garðabæ er fjölbreyttara, sveigjanlegra og þjónustar nemendur betur en ella. Þá hefur Ásdís verið áberandi í umræðunni á þessu ári um baráttu Kliníkurinnar í Ármúla fyrir sjálfstæðum rekstri í heilbrigðiskerfinu. Slíkur rekstur bætir þjónustu við sjúklinga, styttir biðraðir og nýtir skattfé betur,” segir í tilkynningu SUS.

,,Sá lögaðili sem hlaut verðlaunin í ár er Hvalur hf, en Kristján Loftsson, forstjóri fyrirtækisins, tók við verðlaununum. Hvalur hf hlaut verðlaunin fyrir baráttu sína fyrir hvalveiðum á Íslandsmiðum. Hvalveiðar fela í sér mikilvægt atvinnufrelsi en Hvalur hf hefur í fjölmörg ár barist fyrir því að veiðar á hvölum séu leyfðar, enda er um sjálfbæra nýtingu að ræða sem styðst við vísindaleg gögn.”

Við fyrirspurn blaðamanns um hver sé tilgangurinn með frelsisverðlaununum svarar Ingvar Smári Birgisson, formaður SUS, að tilgangurinn sé að ,,verðlauna þá aðila sem SUS telur að hafi með einhverjum hætti aukið frelsi á Íslandi. Þá annaðhvort á árinu, í ævistörfum sínum eða í tilteknum verkefnum.”

Ingvar segir að verðlaunahafar frá upphafi séu mjög fjölbreyttur hópur. ,,Þetta hefur verið öll flóran af verðlaunahafanna. Til dæmis fékk Andri Snær Magnason eitt sinn verðlaunin fyrir umhverfisvernd” en Andri Snær Magnason var ásamt Herði Helga Helgasyni fyrstur til að hljóta verðlaunin árið 2007. ,,Hjallastefnan hefur líka fengið verðlaun, og svo hinir og þessir þingmenn eða aktívistar.”




Vinsælast

Aðrar fréttir 




Sólrún Sen