Konur mega taka þátt í Ungfrú Ísland, viðtal við Birgittu Líf

Sólrún Freyja Sen skrifar

 Birgitta Líf Björnsdóttir

Birgitta Líf Björnsdóttir

Sumum finnst Ungfrú Ísland stuðla að óraunhæfum útlitskröfum og vera barn síns tíma sem á ekkert við í nútímasamfélagi. En afhverju er þá alltaf nóg af konum sem vilja taka þátt, og nóg af fólki sem  horfir á keppnina? Hvað er það nákvæmlega við Ungfrú Ísland sem stuðlar að óraunhæfum útlitskröfum? Stuðla Músíktilraunir að óraunhæfum kröfum um hljómhæfileika?

Það er auðvitað af hinu góða að Ungfrú Ísland keppnin hefur tekið ýmsum breytingum, víkkað hóp þáttakennda og breytt ýmsum áherslum. En á meðan  ennþá er áhugi fyrir því að taka þátt í Ungfrú Ísland ættu keppendur ekki í sífellu að þurfa að verja og réttlæta að þeir ákváðu að taka þátt. Rétt eins og keppandi í Ísland Got Talent ætti ekki að þurfa í sífellu að útskýra að hann sé  með til að hafa gaman og kynnast nýju fólki, þó að það sé örugglega feitur plús við keppnina. Afhverju verða þáttakendur í Ungfrú Ísland þá sífellt fyrir aðkasti í fjölmiðlum? Snýst kvenfrelsi ekki um að fá að taka eigin ákvarðanir og þurfa ekki sífellt að verja þær ákvarðanir? Verða allar konur alltaf að ábyrgjast það að öðrum hugnist ekki það sem þær eru að gera, að fólk sé öfundssjúkt út í þær, eða vilji að þær geri hitt frekar en þetta?

Birgitta Líf Björnsdóttir er framkvæmdastýra Ungfrú Íslands, og hafði ýmislegt að segja. Hún kveðst ekki skilja afhverju sumir séu á móti keppninni eins og hún er í dag. “Ég skil það algjörlega miðað við hvernig keppnin var áður, hún var náttúrulega bara gamaldags. En það er 2018 núna. Að mínu mati mega allir gera það sem þeir vilja, og mér finnst femínistabaráttan snúast um það að konur hafi frelsi. Mér finnst vera frekar öfugssnúið að gagnrýna að stelpur séu að taka þátt í Ungfrú Ísland, að það sé það sem þær vilja. Konur eiga mismunandi áhugamál og vilja mismunandi hluti. Þannig að þær sem hafa áhuga á því sem viðkemur Ungfrú Ísland, að koma fram, læra förðun og að sitja fyrir ,til dæmis; auðvitað mega þær gera það.” Hún segir að stjórnendur keppninnar í dag séu ekki með neinar útlitskröfur, og leggi áherslu á að ferlið sé skemmtilegt og uppbyggjandi.

Núverandi eigendur Ungfrú Íslands tóku við eignarhaldinu fyrir þremur árum, og hafa meðal annars breytt sigurtitlum keppninnar. Meðal annars tóku þau út 1., 2. og 3. sætið. “Okkur fannst það ekki passa við okkar sýn á hvað Ungfrú Ísland er, það er enginn sætari en annar eða flottari en annar.” Í staðin eru þau með einn titil fyrir þá konu sem fer út í Miss World keppnina, “Miss World Iceland”. “Síðan erum við með íþróttatitilinn, sportstúlkan. Vð vorum við með íþróttakeppni í sumar. Það var mjög sanngjörn og skemmtileg keppni og ótrúlega gaman.” Þar að auki er möguleiki á að vinna titlana “ljósmyndafyrirsætan” og “Miss Talent”, og vinna vinsældarkosningu sem haldin er á Facebook. “Það er val um að taka þátt í hverju og einu, þú þarft til dæmis ekki að taka þátt í íþróttakeppninni. Þær fá annars allar verðlaun og allskonar skemmtilegt á meðan að ferlinu stendur yfir.”

En afhverju taka konur þátt í Ungfrú Ísland? Það hefur verið áberandi að þáttakendur segist vilja læra framkomu og stíga út fyrir þægindarramman. “Ég held að það séu náttúrulega mjög mismunandi ástæður hjá hverri og einni, en almennt langar stelpum að prófa eitthvað nýtt og skemmtilegt, kynnast nýjum stelpum. Að standa á sviði, koma fram í sjónvarpi, fara í viðtöl.”

Síðast þegar valið var úr umsóknum um þáttöku í keppnina hafi markmiðið verið að setja saman fjölbreyttan og skemmtilegan þátt. Birgitta segir að það sé enginn sem er neitað þáttöku út af einhverjum útlitsatriðum  “Í viðtölunum kom kannski í ljós að einhver var að fara til útlanda í heilan mánuð yfir sumarið og þá náttúrulega passaði ekki að taka þátt í ferli sem er yfir allt sumarið. Sumar voru of ungar og hefðu kannski áhuga á að koma eftir 1-2 ár. Við í rauninni bara ræðum saman við umsækjendur um hvort það passi að taka þátt akkúrat núna. Það er alltaf næsta ár. Þetta er bara eins og með allt annað, það geta ekki allir verið með alltaf. Það þarf að velja úr. Við erum líka mjög fjölbreyttur hópur sem tekur viðtölin, og setur saman skemmtilegan hóp sem virkar saman hvert ár.”

Markmiðið hjá núverandi eigendum keppninnar er að breyta keppninni og gera hana nútímalegri, og að breyta ímynd fólks á keppninni. “Við erum með öðruvísi markmið og okkar eigin sýn. Við höfum séð svo ótrúlega margar stelpur blómstra í gegnum þetta ferli og okkur langar að veita öllum tækifæri til þess, á meðan að við getum.”

Birgitta segir að sniðinu á keppninni fyrir 2018 verður breytt, og tilkynnt verður um hversskonar breytingar um er að ræða núna í mars.

Að lokum: Auðvitað er það góður hlutur að keppnin sé að verða nútímalegri, en hvort sem að keppnin væri það eða ekki, að þá er orðið frekar þreytt að konur fái ekki bara að sinna áhugamálum sínum í friði, hvort sem það er að farða sig eða að ditta að gömlum bílum. Reynum að halda ró okkar fyrir Ungfrú Ísland 2018.

Topp 5

Sólrún Sen