Spíra mánaðarins er Embla Wigum

Rétt eins og önnur listform hefur förðun tekið miklum breytingum á síðustu árum með tilkomu nettengingar. Veraldarvefurinn gefur ekki bara fleiri listamönnum tækifæri til að koma sér á framfæri heldur hefur hann rutt veginn fyrir nýjum leiðum til listsköpunnar. Embla Wigum er 19 ára förðunarfræðingur, sem hefur vakið mikla athygli á Instagram. Embla stundar nám í Menntaskólanum við Hamrahlíð, en hún  útskrifaðist fyrir rúmu ári síðan úr Reykjavík Makeup School.

 Mynd: Hinrik Aron Hilmarsson

Mynd: Hinrik Aron Hilmarsson

Hvenær gerðir þú þér grein fyrir því að þú hafir áhuga á förðun?

,,Ég hef lengi haft áhuga á förðun en það má segja að áhuginn hafi virkilega byrjað að blómstra þegar ég var 15 ára. Þá fór ég að farða af meiri alvöru. Það var samt ekki fyrr en ég byrjaði í förðunarskólanum að ég fór að líta á þetta sem framtíðarvinnu frekar en bara áhugamál. Ég fékk miklu meira sjálfstraust til að gera skapandi og óhefðbundna hluti eins og ég er að gera núna.“

Hvað lærðir þú helst í náminu?

,,Það sem ég held að ég hafi helst lært er tæknin. Það skiptir rosalega miklu máli að nota rétta tækni í mismunandi verkefnum. Það skiptir líka máli að læra að nota réttar vörur til að fá útkomuna  sem þú vilt fá. Fyrir utan það myndast ákveðin tengsl í skólanum. Félagslegi þátturinn, að fá að deila áhugamáli þínu í faglegu umhverfi með fullt af fólki, er frábær tilfinning. “

 Mynd: Hinrik Aron Hilmarsson

Mynd: Hinrik Aron Hilmarsson

Hefði það sem þú ert að gera í dag verið hægt fyrir 20 árum?

,,Ég er ekki alveg viss. Samfélagsmiðlar gjörbreyttu hvernig förðunarheimurinn virkar. Það sem ég er að gera er til dæmis ekki förðun sem þú ferð út úr húsi með. Fyrir 20 árum síðan var ábyggilega miklu erfiðara að gera frumlega og skapandi förðun, það er miklu léttara í dag að afla sér upplýsinga um mismunandi farðanir og tækni. Ég var alltaf mjög dugleg að afla mér upplýsinga og horfa á kennslumyndbönd á YouTube um förðun löngu áður en ég ákvað að fara að farða af alvöru. Markaðurinn fyrir förðunarvörum hefur stækkað og samfélagsmiðlar hafa skapað atvinnumarkað fyrir fullt af fólki sem hefði annars aldrei getað tileinkað sér þennan iðnað.“  

,,Ef það væri ekki svona mikil samkeppni væri ekki jafn mikill metnaður fyrir því að verða betri“

Embla segir að tæknin skipti miklu máli en það sé erfitt að vekja athygli  án þess að vera skapandi. Samkeppnin er grimm. ,,Með auknu aðgengi að kennslumyndböndum og förðunarskólum verður maður að leggja mikið upp úr því að vera öðruvísi en allir hinir. Þetta er mikil vinna en þannig er það með flesta hluti í lífinu, sá sem vinnur harðast hann kemst oftast lengst“. Þar sem förðunarlist er tiltölulega ný af nálinni segir Embla að viðhorfið sé enn á þann veg að þetta sé ekki alvöru list. ,,Eldra fólk heldur að ég sé bara eitthvað heima að mála mig allan daginn. En þetta er svo miklu meira en það“.  

Samfélagsmiðlar eru meðal annars notaðir til að koma sér á framfæri í förðun og segir Embla að ,,margir eru með neikvætt viðhorf gagnvart starfsgreinum sem tengjast samfélagsmiðlum á einhvern hátt, og líta bara á þetta sem eitthvað trend sem mun deyja út þrátt fyrir að það blómstri í dag“.

Embla segir förðunarbransan alls ekki vera bara fyrir konur og að margir færustu förðunarfræðingar heims séu karlmenn. ,,Ég held að kynjahlutföllin séu að jafnast út því strákar sjá aðra stráka vera að farða, og þessvegna fara fordómar gagnvart strákum sem mála sig eða hafa áhuga á förðun minnkandi.“ Embla segir að bransinn sé hægt og rólega að breytast á Íslandi og hún sé að sjá fleiri karlmenn málaða meðal almennings. Embla vonar að markaður förðunarvarnings fyrir karlmenn fari að stækka.

,,Ég tilheyri mjög listrænni fjölskyldu. Ég og bróðir minn höfum alltaf verið í tónlistarnámi og höfum alltaf verið að mála eða teikna.“

Aðspurð um framtíðina segir Embla að ,,það sé hægt að gera allskonar við förðunarmenntun hér á Íslandi. Þú getur starfað heima og tekið að þér pantanir þangað, unnið með ljósmyndurum eða leikstjórum til dæmis. Það er hægt að gera fullt af mismunandi og spennandi hlutum en það sem mig langar helst að gera er að prófa mig áfram í svokallaðri ,,special effects“ förðun fyrir bíómyndir og fleira.“

Embla hefur tekið að sér næstum öll verkefni sem bjóðast henni. Hún er að vinna með WagTail sem er íslenskt fatamerki. Síðan hefur hún unnið mikið með ljósmyndurum sem eru að safna að sér verkefnum fyrir til dæmis ljósmyndunar nám.

,,Eitt skemmtilegasta verkefnið sem ég hef fengið var þegar ég fékk eiginlega fullt listrænt frelsi. Einu skilyrðin voru að þemað varð að vera rautt. Ég tók bara fullt af rauðum varalitum og skellti á kinnarnar á módelinu sem ég var að vinna með. Þetta kom ógeðslega vel út og var mjög skemmtilegt.“

,,Oft þegar ég hef verið að vinna verkefni með til dæmis ljósmyndurum er ég beðin um að gera eitthvað ákveðið og kann það kannski ekki alveg, en ég lærir það bara á meðan ég er að gera það. Þrátt fyrir að það hljómi smá stressandi þá hefur svoleiðis vinna aflað mér helling af reynslu og endar alltaf mjög skemmtilega. Maður veit ekki alltaf hvaða aðstæðum maður lendir í, þessvegna verður maður að vera sveigjanlegur.“

,,Ég held það sé mjög mikilvægt og gaman fyrir alla að geta skapað eitthvað sem er bara manns eigið. Ég held það sé mjög þroskandi. Oft þegar ég hef átt erfiðan dag eða eitthvað, þá finnst mér mjög læknandi að setjast bara niður og mála eitthvað á mig. Það getur verið ógeðslega ljótt eða ógeðslega fallegt, það fer allt eftir hvernig skapi ég er í. Þú færð mikla tilfinningalega útrás í því að skapa eitthvað, ég held það eigi við um öll listform.”

,,Öll sköpun kemur frá sama stað, það er bara mismunandi hvernig fólk skilar sköpuninni frá sér.“

Embla æfði á píanó í fjögur ár, síðan æfði hún á gítar í tvö ár og svo á bæði þverflautu og söng í eitt ár. ,,Ég held það sé samspil milli allra listforma. Maður finnur að krafturinn á bakvið sköpunina er svo mikill. Það er ótrúleg tilfinning.“

Embla var alltaf mikið að mála og teikna, en segir að maður þurfi ekki endilega að vera góður í að teikna til að geta verið góður förðunarlistamaður. ,,Margir sem ég þekki eru alls ekki góðir í að teikna á blað en eru svo ógeðslega góðir í að mála sig. Maður er kannski með pínu forskot varðandi fínhreyfingar ef maður er góður í að teikna en það er alltaf hægt að læra þær. Ég held að ef þörfin fyrir því að skapa eitthvað er til staðar þá geta allir orðið góðir í því.“

Við þökkum Emblu kærlega fyrir. Hægt er að skoða fleiri verk eftir hana hér.

Kristján Ernir Björgvinsson skrifaði




Vinsælast

Sólrún Sen